من وين جيت ووين صرت وكيف قلبي فيك ذاب _ فيصل اليامي

من وين جيت ووين صرت وكيف قلبي فيك ذاب
فجأه لقيتك داخلي بالله قل من وين جيت

معروف قلبي عادته يلعب لكن معك تاب
ما فيه داعي للعب مادام للقمه رقيت

ياللي مرشح للغلا في داخلي دون انتخاب
الصيت صيتك ياغلاي وما بعد ذا الصيت صيت

الظاهر انك لو طرحت اسهم لحبك باكتتاب
تداولو ذالناس عشقك ثم بنوا في البنك بيت

وانتظروا الفايز يجيهم لاكتمل حد النصاب
تقول كنه بيتكم صاير على اوول استريت

تذكر سعد علوش يوم انه قصد بالانسكاب
كل ما ذكرتك قمت اردد ذا القصيده بيت بيت

مقارنه غيرك معك تعريف للظلم المهاب
الظلم اللي التفت للغير ما دامك لفيت

تتوقع ان المرسدس ممكن نقارنها بساب
يعني على ذا الحال ممكن نقلب اللكسز ونيت

أدوخ لاشفتك وكني بالمشي لاعب مصاب
تتلخبط الخطوه معاي احس كني ما مشيت

وان شفت زولك فرحتي توصل الى حد السحاب
كنك هدف من راس ماجد وداخل بمرمى الكويت

ما اعرف انا تموز او تشرين ومدري ويش آب
اعرف باني سادس العيد التقيتك ثم بديت

بديت مشوار المحبه والسعاده والعذاب
تخالطت عندي المشاعر في غرامك واهتنيت

حسستني طعم انتصاري بالذهاب وبالاياب
علمتني اجمع نقاط الفوز واوصل ستريت

يا توب تن بكل محطه من محطات الشباب
يا ذوق يا رقه يا راقي يا معاني الاتكيت

أصيل ورابح والجسمي دندنوا شعري وجاب
أحلى أغاني غنّيت لأجلك وانا لاجلك هوويت

اسّست في بالي دفاتر شعر وبقلبي كتاب
لولاك بعد الله نساني الشعر ولا انا نسيت